Hebrews 11

Ngokukholwa

1Ukukholwa yikuba leqiniso lalokhu esikulindeleyo njalo kuqinisekile ngalokho esingakuboniyo. 2Lokhu yikho abendulo abanconywa ngakho.

3Ngokukholwa siyezwisisa ukuthi izulu lomhlaba kwadalwa ngokulaya kukaNkulunkulu, ukuze kuthi okubonakalayo kakwenziwanga ngalokho okwakubonakala.

4Ngokukholwa u-Abela wanikela kuNkulunkulu umhlatshelo ongcono kulokaKhayini. Ngokukholwa wanconywa njengomuntu olungileyo, lapho uNkulunkulu wakhuluma kuhle ngeminikelo yakhe. Njalo ngokukholwa ulokhu ekhuluma, lanxa sewafa.

5Ngokukholwa u-Enoki wasuswa kulokhu kuphila, ukuze angakuzwa ukufa; kabonakalanga, ngoba uNkulunkulu wayesemthethe. Ngoba engakathathwa, wayenconywe njengowayethokozise uNkulunkulu.

6Kungelakukholwa akwenzakali ukuthokozisa uNkulunkulu, ngoba oza kuye kumele akholwe ukuthi ukhona lokuthi uyabanika umvuzo labo abadinga ngobuqotho.

7Ngokukholwa uNowa esexwayisiwe ngezinto ezazingakabonakali, ngokwesaba okungcwele wakha umkhumbi ukuba ahlenge abendlu yakhe. Ngokukholwa kwakhe wawulahla umhlaba waba yindlalifa yokulunga okuza ngokukholwa.

8Ngokukholwa u-Abhrahama esebizelwe ukuba aye endaweni ayezayamukela muva njengelifa lakhe, walalela wahamba, lanxa wayengakwazi lapho ayesiya khona.

9Ngokukholwa wahlala elizweni lokuthenjiswa njengesihambi elizweni elingasilo lakibo; wahlala emathenteni, njengokwenziwa ngu-Isaka loJakhobe, ababeyizindlalifa kanye laye zalelolizwe lesithembiso. 10Ngoba wayelindele idolobho elilezisekelo, elimcandi walo lomakhi walo nguNkulunkulu.

11Ngokukholwa, lanxa u-Abhrahama wayeseluphele – loSara eyinyumba – wanikwa amandla okuba lomntwana ngoba wambona njengothembekileyo lowo owayenze isithembiso.

12Ngakho kusukela kulo umuntu oyedwa, owayefana lofileyo, kwavela inzalo enengi njengezinkanyezi emkhathini njalo engeke ibalwe njengenhlabathi ekhunjini lolwandle.

13Abantu bonke laba bafa belokhu bephila ngokukholwa. Kabazamukelanga izinto ezathenjiswayo; bazibona nje kuphela bazithakazelela kude. Njalo bavuma ukuthi bona babeyizizwe lezihambi emhlabeni.

14Abantu abakhuluma izinto ezinje babonakalisa ukuthi bafuna ilizwe elingelabo.

15Aluba babecabanga ngelizwe abasuka kulo, babezakuba lethuba lokubuyela. 16Kodwa-ke bona babefuna ilizwe elingcono – elasezulwini. Ngakho uNkulunkulu akumyangisi ukubizwa ngokuthi unguNkulunkulu wabo, ngoba usebalungisele idolobho.

17Ngokukholwa, kwathi u-Abhrahama elingwe nguNkulunkulu, wanikela u-Isaka njengomhlatshelo. Yena owayamukele izithembiso wayeseseduze ukuba anikele indodana yakhe eyodwa njalo eyiyo kuphela,

18lanxa uNkulunkulu wayethe kuye, “Ngo-Isaka kuzavela inzalo yakho owayithenjiswayo.” 19UAbhrahama wanakana ukuthi uNkulunkulu wayengabavusa abafileyo, njalo nxa kuzekeliswa, wamamukela u-Isaka evela ekufeni.

20Ngokukholwa u-Isaka wabusisa uJakhobe lo-Esawu mayelana lekusasa labo.

21Ngokukholwa uJakhobe, esesifa wawabusisa wonke amadodana kaJosefa, wasekhonza eyame phezu kodondolo lwakhe.

22Ngokukholwa uJosefa, isiphetho sakhe sesisondele, walandisa ngokuphuma kwabako-Israyeli eGibhithe walayezela ngamathambo akhe.

23Ngokukholwa abazali bakaMosi bamfihla izinyanga ezintantu emva kokuzalwa kwakhe, ngoba babona ukuthi wayengasumtwana nje ojwayelekileyo, njalo babengawesabi umthetho wenkosi.

24Ngokukholwa uMosi, esekhulile, wala ukuba aziwe njengendodana yendodakazi kaFaro. 25Wakhetha ukuphathwa kubi kanye labantu bakaNkulunkulu kulokuba akholise injabulo yesono okwesikhathi esifitshane.

26Wakhetha ihlazo ngenxa kaKhristu njengegugu elikhulu kulengcebo yaseGibithe, ngoba wayekhangelele umvuzo phambili.

27Ngokukholwa wasuka eGibhithe, engalwesabi ulaka lwenkosi; wabekezela ngoba wambona lowo ongabonakaliyo.

28Ngokukholwa wagcina iPhasika lokuchelwa kwegazi, ukuze umbulali wamazibulo angawathinti amazibulo ako-Israyeli.

29Ngokukholwa abantu badabula phakathi koLwandle oluBomvu njengasemhlabathini owomileyo; kodwa kwathi amaGibhithe ezama ukwenza njalo, agalula.

30Ngokukholwa imiduli yaseJerikho yadilika, emva kokuba abantu beyibhode okwezinsuku eziyisikhombisa.

31Ngokukholwa uRahabi isifebe, ngokuba wamukela izinhloli, kabulawanga kanye lalabo ababengalaleli.

32Kuyini okunye engingakutsho? Kangilasikhathi sokulandisa ngoGidiyoni, loBharakhi, loSamsoni, loJefitha, loDavida, loSamuyeli kanye labaphrofethi, 33abanqoba imibuso ngokukholwa batshaya imithetho, njalo bathola okwakuthenjisiwe; bona abavala imilomo yezilwane, 34bacitsha ukuvutha kwamalangabi, baphepha lasebukhalini benkemba; ababuthakathaka babo bezwa amandla; njalo ababa lamandla empini bawachitha amabutho ezizweni.

35Abesifazana bamukela abafayo babo sebevuselwe ekuphileni futhi. Abanye bahlukuluzwa njalo bala ukukhululwa, ukuze bathole ukuvuka ekufeni okuhle. 36Abanye bahozwa batshaywa, kwathi abanye babotshwa ngamaketane bafakwa entolongweni.

37Batshaywa ngamatshe, baqunywa ngesaha baba ziqambili; babulawa ngenkemba. Bahamba begqoke izikhumba zezimvu lezikhumba zezimbuzi, beswela, behlukuluzwa, bephathwa kubi – 38umhlaba kubo wawungabafanele. Bantula enkangala lasezintabeni lasezimbalwini kanye lasemilindini emhlabathini.

39Bonke laba banconywa ngokukholwa kwabo, ikanti kakho owabo owathola okwakuthenjisiwe.

40Thina uNkulunkulu wayesimisele okuhle ukuze bapheleliswe yikuba kanye lathi kuphela.